Keterubah aku meri selamat lemai sereta selamat datai ngagai bala kitai ka bisi ditu.(Manah agi didinga enti kitai ngelala nama, pengawa enggau pangkat sida tu)
Nyadi baka ka sari tu kitai bejadi lalu ngerami seduai (sebut nama) tu jadi melaki bini.
Nyadi pengawa kitai baka ka lemai tu besai bendar reti iya, kelebih agi ba seduai iya empu enggau sida iya sebilik laban tu meh pengawa ka suah disampika bala apai indai, ka meda anak sida nirika rumah tangga.
Baka nya mega bala bujang dara, pengawa ka baka tu endang digiga, endang dianti.
Kabuah aku madaka baka nya laban sechara normal iya setiap iku kitai bisi tiga kali dikemegauka orang; iyanya keterubah iya maya kitai ada ke dunya tu. Maya tu, sekurang-kurang iya bisi meh kaban belayan, orang sepiak-sepiak datai ngulu lalu nanyaka nama penempa anak kitai.
Kedua iya, maya kitai belaki bebini, baka ka lemai tu.
Ketiga kali iya orang begelumu ka kitai iyanya maya kitai mati ninggalka dunya tu. Maya tu sebaruh-baruh pendiau tauka baka ni ka penyelai ulah kitai maya ka idup di dunya injau tu bisi meh orang datai ngulu pemati kitai. Tang enti sema iya bisi kurang tauka lebih ari tiga kali tu, nya tepanggai ba nasib kitai siku-siku.
Siti ari pekara ka ka dikenang aku ba kitai mayuh ditu, kelebih agi ngagai seduai ka jadi melaki bini tu enggau sida iya sebilik iyanya pasal pengerindu. Bisi rambai jaku orang putih ka ngemai reti iya enti dalam jaku Iban; Pengerindu endang enda kala minta tang selalu deka meri belama. Nya alai sapa-sapa ka idup dalam pengerindu sama bela bulih pengasih enggau penyayau ari pangan diri, ukai semina ari seduai iya tang mega ari bala entua, ipar enggau kaban belayan.
Enti sama bulih pengasih enggau penyayau utai bukai anang telah agi, endang sigi bulih laban pengasih enggau penyayau tu meh kunchi penyenang kitai begulai melaki bini lalu enda ulih dibeli kitai ngena mata duit. Nya alai pengerindu ka pangan diri beguna amat ngambika pengidup kitai belaki bebini senang lantang sereta meruan, taja pan dituntung penusah.
Siti agi pekara ka ka dikenang aku ditu iyanya, pasal madu enggau rachun. Pengidup kitai mensia di dunya tu endang bisi madu enggau rachun. Madu iya ditu iyanya pemajik tauka penyigat gamal kitai siku-siku, pemanah ulah, pementas, pengelandik, penyiru, pemagas enggau bemacham-macham agi pekara ka manah-manah.
Nyadi pemanah ka baka tu endang digiga lalu dikerinduka semua orang. Tang rachun, iyanya gamal ka enda manah, ulah-ulah ka enda manah baka ngelusu, pengirup, penginsap, udu ka bemain, pengutur, pengamah enggau bemacham-macham pengenyai ka bukai, ka ngasuh ati kitai begedi meda iya. Ba senentang tu kitai mesti ka nerima madu enggau rachun tu, kitai anang ngarapka orang berubah nitihka chara tauka atur kitai, tang kitai mega mesti sanggup ngubah diri nitihka chara orang ka enggau kitai begulai.
Ari tu baru kitai ulih segulai sejalai enggau meruan. Seduai ukai semina sanggup nerima madu enggau rachun ba pangan diri tang mega sanggup nerima madu enggau rachun bala entua, ipar enggau kaban belayan ka bukai.
Enggau awak tu megai, aku ka nyebut pasal nguai tauka enda nguai.
Ba sesetengah orang, nguai enda nguai tu isu sensitif lalu tau ngasuh ati enda lantang. Enti agi kelia pasal nguai tauka enda tu dipantangka orang bendar maya ngatur diri belaki bebini, tu nyangka laban menua jauh lalu tusah ka nemu berita ari pangan diri, lalu mega tusah ka bekirumka pesan tauka belanja enggau barang ka bukai. Siti agi nama kabuah nguai tu mesti nyemetak diputuska maya ngatur diri belaki bebini tu iya nya ngambika enda tusah enti iya mati, dia alai iya nguai, dia meh alai nyenggai.
Tang diatu, hal nguai enggau enda tu ukai bepanggai ba pemutus jaku, tang bepanggai ba ati diri empu. Nguai pan tua, enda meh semestiya diau begulai enggau entua laban diati kitai nyau sampal bekerja tauka mindah sebelah nengeri. Kelimpah ari nya, diatu mega udah bisi jalai raya, radio, telefon binching ka murah enggau internet kena kitai bekirum berita enggau bala apai indai, menyadi enggau kaban belayan. Baka nya mega baka belanja ulih dikirum ngena bank, tekan ka aja ba teller machine ulih duit datai nada ngira dini-dini endur tauka penyauh kitai ari pangan diri.
Agi suba mayuh orang takut nguai, kelebih agi enti ensepi tulang diri tak lembau selalu, laban kelia kerja berat-berat baka ngambi kayu api, nyauk, ngiga lauk, nebas, nebang, nugal, mantun, ngetau maya bumai betaun. Udah badu ngetau, ngangkut padi ga agi. Tu meh ngasuh sekeda orang tak mantul-mantul nguai laban gawa ba bilik entua enda baka peneka kitai ba bilik diri.
Iya ka penudi, kena aku ngujungka jaku aku ngarapka seduai ka jadi melaki bini tu
betuchung baka bukit,
bekebung baka langit
bepunchak baka jala
chelap lindap ngaun menua
bulih duit, bulih ringgit
bulih anak bulih telesak.
Nya aja; terima kasih
No comments:
Post a Comment