Biau Pengabang Maia Gawai Mangkung Tiang

Leboh rumah orang ke begawai nyambut pengabang, orang ke dipadu ka bebiau lalu bediri di tengah tugong bala, lalu miau sida enggau manok, munyi tu: 

Sa, dua, tiga, empat, lima, enam, tuuuuuuuuujoh!!!! 

Aku ke bediri kaya-kaya,
Minching selanjau ijau manok banda,
Ukai laban aku balat galak jegak lain baka,
Aku ga nunda adat lama kitai ari jeman dulu kelia,
Meri kita tabi enggau adat basa,
Meda kita ke betuboh mua pemaioh betunga moa,
Kita ke datai nya ngena timpoh abis semaia,
Nadai alai kita ngintai ka mimpi tindok lina,
Nadai endor kita ngintai ka igau diau di menoa.
Nyangka kita ke bisi sipat mimpi ringat,
Kena pansa mimpi bisa,
Leboh kita ke niki bas nepan entuka, Sapanjai jalai sabelah menoa. Nyangka kita ke bisi laboh pimpin ke bemain di jalai raya,
Nyangka kita ke bisi kena raup ke ngelikup mansa moa.
Enti iya udah dibiau aku enggau selanjau manok banda tu,
Nadai iya apa agi ko Petara,
Gerai nyamai kita ko Raja Selampandai.

Nya alai aku ke bediri tenjan-tenjan,
Megai selanjau ijau manok jelayan,
Ukai laban aku bangat galak jegak jelar-jelar.
Tang aku nunda adat lama,
Kitai ari kelia selama jeman.
Meda kita ke betuboh maioh bekaban,
Kita ke ulih ngambi bekirom pesan,
Bedanji ka ari chukop malam,
Besain ka minit ngena jam.
Nyangka kita ke bisi salah igau nyandau malam,
Bisi igau irau begawan,
Nyangka kita bisi di sipat mimpi ringat,
Kena pansa mimpi rawan.
Nyangka leboh kita ke bejalai sabelah utan,
Nyangka kita bisi salah pimpin ke bemain sabelah jalan,
Nyangka kita bisi laboh raup ke ngelikup kiba kanan.
Enti kita udah di kabau aku enggau selanjau ijau manok jelayan,
Tabar iya laar buai kabukai.

Nya baru degi-degi anak kemali lelaki,
Tumboh ditisi jalai raya.
Nya baru aku miau kita ngena biau sampi puji,
Lak ka tau nyadi saleka-dua.
Amat ga penemu enggi aku tu,
Nadai menuku manah didinga,
Tang enti deka tau ga iya dikena,
Enti enggai tau ga iya dibuai,
Nadai ga iya nyadi apa. 

Nya alai lama aku udah meda kita,
Enggau sula leka mata.
Lama ga aku tu udah bayam bala kita,
Enggau pensingan dabong saleka,
Nya alai kasih sayau lidi aku tu,
Nyau malu di ati panggong kawa,
Kasih lupu tudah aku tu,
Nyau malu di lempedu kandang dada,
Laban tudah aku tu nadai penemu manah didinga.
Tang laban aku diasoh nembu ka pengawa,
Nyangkai ka gawai nembu ka kerja.

Lama aku udah meda ngepan kita,
Ke nyeruran chukop gaya,
Meda kasut enggi kita bujang lembut,
Meda tanchut kita tak bela unsut terika.
Aku meda pisin kita bujang rajin,
Baka ke bemain mandang moa,
Meda jam tangan kita bujang ganggam,
Lekat di lengan baka tepan kesulai raja
Aku nampai neck-tie kita bujang besai,
Taja kepai kepai merundai mangka dada.
Meda fountai pen kita bujang rajin,
Lekat di kanchin baju kemija,
Ke bekilat mua pemalat,
Tangkap kijap chermin mata,

Tak lama aku ngenong meda kita,
Ke renjong-renjong dudok nyerungkong,
Ngena bandong imbai pesila.
Ukai enda patong enggi kita,
Kena bandong Sengalang Burong,
Aki Lang Menaul Banda.
Kerigai mudai enggi kita bujang besai,
Kena Imbai Rangkang kirai,
Raja Sempulang Gana.
Keba paah enggi kita bujang bungah,
Bisi kena panah Raja Tuah,
Kedua nama iya Anda Mara.
 

Ukai enda kita ke dudok berimbai,
Di adang kami kena imbai Raja Salempandai seduai Bhiku Bunsu Petara,
Lalu kening kita kena perening Keling seduai Laja.
Kita ke berimbai dudok nyeringgang,
Kada enda bisi kita di-inang Menjaya Raja Manang.
Enti hari malam aku ninga rita kita,
Enda kala padam api kelita.

Semua kita ke Penghulu temu aku,
Endang kena intu Bunsu Petara.
Bisi ga kita panah ka jadi Tuai Rumah,
Ke digelar anak uda,
Enti maia bumai kita endang temu kami pandai ngator antara.
Bisi ga kita ditu pandai tulong pintar,
Nyadi pengajar nyaga sekula,
Endor ngansah anak kitai belajar,
Nyadi tajam ngiga pengidup ke menyana.
Bisi ga kita ditu dikumbai Pengari Kunsil Negeri,
Dipilih rakyat karong peti undi,
Nyadi pengari matak jari mensia jelata.

Nya alai kita ke berimbai dudok besila,
Kena tengkadah aku baka ka meda buah,
Asai ke sakali ngekah saum leka.
Lama aku udah nentang kita,
Asai ke meda barang sama sagudang saum rega.
Tuboh kita amat enda maioh,
Tang asai ke ka siko siti nama,
Ngaga ka kita gela batang nama.
Deka aku ngelar kita ngagai Barong Bangkong Pangala,
Enggi niang Rekaya Dana menya,
Ke masai ngundan pancha tiang kelakuyang.
Tang enggai nyadi disema ka aku tunga kia,
Laban kitai kemia tu nadai alai agi nguji,
Ka pemerani ngetup besi mata baja.
Laban munsoh nadai agi bebunoh ngaboh menoa,
Laban menoa ulu udah kena tampal Kubu Raja dijaga tentera.
Ai siti pan udah ga kena anti Kubu Malaga,
Ari atas kitai udah kena tudong ayong menira Malaysia.

Nya alai lama meh aku tu udah ngiga,
Deka ngaga gela batang nama enggi kita.
Deka aku ngelar kita ngagai menyaung tuchong Bukit Lingga,
Ba iya ke tinggi legit nya kena belit bukit lulong kerapa.
Tuchong iya wan Tutong seduai Laja,
Orang ke mangkang telata tungku tiga,
Baka ke tau alai Laja mandi bebaya,
Tau alai Kumang mandi nyemerang.
Tang apin ngena ga disema aku kia,
Laban nya agi sema orang kelia jeman menoa.

Nya alai deka aku ngelar kita,
Ngagai selanjau ijau manok banda,
Ke gining-gining dibinching Keling disabong Laja,
Melit bukit ngelingkong menoa,
Enggau digelar aku ngagai jam tangan,
Ka ayam anak Sultan Tuan Raja,
Ke pelu-pelu baka sumbu lampu kelita,
Ke manchar terang mandang menoa.

Tang pengawa tu enda tembu naka nya,
Aku ngaga gela kita muji batang nama.
Laban pengawa kitai kemaiatu lain utai dikadeka,
Enggau lain utai dikereja.
Laban menoa kitai udah merdeka,
Tanah kitai nyau lain perintah,
Menoa kitai udah betukar Raja.
Laban menoa kitai udah di imbai kena pegai Raja Malaya.
Laban kitai udah nemu mangun ka pun getah pera,
Nya alai kitai nyau gaga rindu ria,
Ka getah nyatu ke dulu dipeguna China.
Tunjok anak kitai nyau enda beduli,
Ka latak beujak ka tambak paung lada.
Laban kitai nya nemu bekereja begotong royong,
Ngaga gerempong kerja sama.

Nya alai naka nya aku nyema ka labong lama enggi kita,
Ke sama bela nadai timpang.
Tu baru aku nyebut lepi suli labong belantan enggi kita akan,
Ke lama udah dikayam aku enggau bulang mata kanan,
Iya ke begamal melan-melan,
Baka tandan bulan pernama.
Tu baru aku ngaga gela umba gelar kita,
Digelar aku ngagai gudang mudan,
Enggi Aki Lang Menaul Buban,
Ke kayak-kayak mua penampak,
Dipeda ari awak Nanga Sungai Sarawak,
Diumba jambatan tampong geretak,
Lantak paku pirak lalau temaga.
Nya baru kitai ulih datai ba gudang mudan,
Ke penoh isi gemala tekang gempanang.

Nya meh naka penemu tudah aku,
Ngadu ka gentelu batang nama.
Enti kita enggai tau buai enda nyadi apa,
Enti kita deka, nya meh utai ka menyana disera.

Sa, aku biau tunda,
Dua, aku miau pengeraja,
Tiga, aku miau harta,
Empat, aku miau niat,
Lima, aku miau kita,
Enam, aku miau mudal,
Tujoh, kita digelar aku bintang laboh ka baruh naban ka bulan.
Gayu kita biau aku, 
Gerai nyamai kitai sakaban.